Jam 5 | MHL | STEP | Aria ni maamuma mua nain, nefa komarka, ni pina samora nain ikoka feenap niar imenarinon, naapeya ni kema-kemaniya omem-ikeka.

James 5

Wi maamuma mua-ke yoowa aawikuan

1 Aria ni maamuma mua nain, nefa komarka, ni pina samora nain ikoka feenap niar imenarinon, naapeya ni kema-kemaniya omem-ikeka. 2 Maa unowa iiriw niar beelalep ikua, ne niena mia suuwowa eliwa nain pun puut mikap samorarep ikua. 3 Ne niena maamuma maneka, gol ne siliwa maa naap nain iiriw ros opak. Ne nain-ke ni niena sira kamenap nain ariman niar wuiya, muut nain ikoka niena maamuma ne niena pun iiwawun mukuna-pa mesenalinon. Moram ni maa unowa fiirimem-ikaiman nain ikoka miiwa fain weeserow epa-pa ni yoowa aawowen. 4 Ni miimaman-i? Ni iiriw wi mua manina nia nopam-ikomiwkin me wia sesenarem-ikeman nain nia sarinemik. Naeya ikoka ni Mua Maneka ekapow epa neeke opora-pa nia wuikuan. Ne wi mua manina nia iwam-ikomamik nain me wia sesenarem-ikeman. Naeya wi omowa-ke ikiwep Mua Maneka iinan akena nain ifana wiar oreya miimak. 5 Ne ni miiwa-pa fan mia kookalowa sira-sira ookami bala eliwa opami enowa eliwa enemi niena niam kema suuwowa muutiw oniman nan mia gawerariman. Ni ikoka fofa samora imenareya fofa nain ni samat arowen. 6 Moram nis-ke wi mua opora marewa nain oram maneka wia opami opora-pa wia wuami wia ifakimeman. Ne wi-ko wapena me nia kiripomamik, weetak.

Kekelka ikowa sira

7 Emar unowik, wi mua nain wia kema suuwap sirirowa niemik nain kekelka muuta ikeka. Naap ikaiwkin Mua Maneka kiiriw nainiw ekapow fofa nain imenarinok. Wi manin uuwow mua wia urufeka. Wi maa upep-puap kekelka muuta arewam-ikaimik. Nuupurum maneka ne muuta imenareya maa baliwep yiar eliwareya enowa maneka aawu naep naap arewap ikaimik. 8 Mua Maneka ekapowa nain epa mamaiya arek. Naapeya nis pun kekelka muuta kekanep ikeka.

9 Ne ni-nieniw me niam omarareka, ne ikoka Mua Maneka-ke me nia mekawinon. O wia mekawowa nain ekapowa mamaiya akena arek. 10 Naapeya emar unowik, nis-ke wi profet iiriw Mua Maneka unuma-pa opora wia maakem-ikemik nain sira wiar aaweka. Wi mua sira eliwa-ke, wi sirirowa aawem-ikemik nain kekelka muuta ikemik. 11 I amisarep maimik, wi mua sira naap nain kekanep ikaiwkin Mua Maneka-ke kema eliwa wiinon. Ni iiriw Yop sirirowa maneka aawep kekelka muuta ikua ^{▼▼5.11Iiriw ekera Yop Mua Maneka opora wiar opak. Satan o akimekam naep Mua Maneka nokareya ae naakeya pina iwok. Naeya Yop muuka wiipa wiar umemik ne maa eneka pun, ne ona pun ikemika mane-maneka aawok. Nain o Mua Maneka me piipuak. Aakisa fan Mua Maneka-ke saliweya napuma sariarek, ne muuka wiipa papako aawok. Nanar nain Olpela Testamen Yop-pa eliw urufinan.} nain miimaman, ne Mua Maneka aakisa fan kema eliwa iwok, nain pun amisareman. Moram Mua Maneka yia kemalowa, ne yia saliwowa kema manek akena ikaiya.

12 Aria emar unowik, maa fain-ke maa maneka, ne ni baliwep akena kema suuweka. Ni opor makena maemi makena-ke efa nauk naep owow iinan e miiwa fain unufami me maeka, e maa oko unufami pun me maeka. Nain, maa makeniya-na, ae naeka, ne weetakeya-na, weetak naeka, naap maep-pueka. Naeya ikoka Mua Maneka opora-pa me arowen.

Mua Maneka farowa sira

13 Aria, ni teeria mua oko sirirowa aawep-na, Mua Maneka farinok. Ne mua oko kema eliwiw ikok-na, os pun Mua Maneka faremi unuma somekiw purupinok. 14 O mua oko-ke napumarep-na ni Yeesus teeria woos mua wia fareya wis-ke ekapep Mua Maneka faremi o unuma unufami wel aawep woosa-pa wiar ifuk. 15 Ne ni Mua Maneka farowa nain kema kuisow ikok o maa nokarowen-na mua nain napuma eliw wiar iirareya sariarinon. Ne pina wiar ikainok-na eliw wiar iirarinon. 16 Naapeya niena pina nain Yeesus teeria mokoka-pa wasirkami niam asipami Mua Maneka niam faromaka. Ne ni eliw sariarowen. Moram wi mua eena Mua Maneka wi mua kakeniw-ke wia naiya nain muutiw o maa nokarimik nain wia apekariya. 17 Nain ni Elaiya kema suuweka, o i saarik naap nain-ke. Nain o iiriw Mua Maneka ipia me orainok naep farep nokarek. Naeya makena, mokoma arow enakiwa naap ipia me orok. 18 Ne kiiriw naapiw nokareya ipia orok. Ne miiwa maa makenaromakek.

Yeesus teeria wiam saliwowa sira

19 Emar unowik, ni feenap amisareka, mua oko Mua Maneka era-pa wiar ookam-ikok piipueya-na mua oko-ke o maakemi kakeninok. Sira nain eliwa-ke. 20 O ikoka epa mukuna anane ikaiya neeke me ekinok naep kakenak. Sira eliwa onak muuta nain pina unowa oniya nain Mua Maneka-ke iirarominon.